أدري إنه ما يهمك

كنت افكر ويش يعني فيك زايد..
عن جميع الناس يوم اني أبيك ؟

قلت اخوي؟ / وصاح بي "صَرفي" يكايد :
لا "أخـوك" ولا "أخـاك" ولا "أخيـك" !!

كل سهل ٍ دون حبك صار كايد
وكل كايد تزهله لمسة يديـك

ما سكت ّ إلا إذا صمتي فوايد
ماحكيت الا إذا سولفـت فيك

وان ذكرتك ليل / جافيت الوسايد
وان ذكرتك صبح / شبيـّت التريك

والهلال إن هلّ ..محد ٍ به يعايد
يحسبــــونه حاجب ٍ من حاجبيك

قلت لي بآجيك وثيابي جدايد
راحت اعيادي وحـنـّا نحتريك

جيت احبك وابدع بيوت القصايد
قلت يمكن // هالذي جاني يجـيك

ليه افكر ويش هاللي فيك زايد ؟
يكفـْي اللي زايدك ... كوني أبيك




حطيت عندك أمانه من ردى فالي
. وازريت اقول إن حاميها حراميها

ياكثر ما خاب فيني ظن عذالي
وياكثر هقوات خابت قبل لاهقيها

ما شفت نخل ٍ وجا لي تمرها حالي
الا والاقي دسيس السمّ ساقيها

مدري تثاقلت اشيل الهم بلحالي...؟
مدري كتوفي عليّ اليوم وش فيها ...؟!

طقيت انا كل باب ٍ شفته قبالي
ما غير باب الرذايل قلت مابـيــها

جنـّبت سمعي دروب القيل والقالي
ورفعت نفسي عن اللي هو يماشيها

عند الشدايد أحلّ معقــّد حبالي
واشد روحي على الضيقات وارخيها

والخير.. مهما جفوه الناس .. يبقالي
والناس ما تجفي الا من تردِّيــها

جربت صمتي لقيت الموتة اشوى لي
والموت عيا على صمتي يعـَـدِّيها




أدري انه ما يهمك بس جيتك : شوف عينك
منها آسلـّم عليك.. و.. منــّها آرد اعتباري

يوووه لو تدري.. جهاتي الاربعه - بيني و بينك –
كلهم من زود حبك زاحموا فيني يساري !!!

علـّـموك شلون ترفع راسك و تعـْـقـِــد يدينك
ما تشوف إلا عبيد ْوخافـقـك كله جواري !!

يوووه يا ذيك المحبة. وينها. ويني ..ووينك ؟!
هو صحيح ان المشاعر كل مافيها تجاري !؟؟؟

أنتصر لك فالمحافل لاجل نـقــهـر عاذلــيـنـك
وانت .. قدام العواذل تنسحب .. ما جبت طاري ؟!

ما دريت اني بكيييييييييت ولا بكيت إلا لعينك
والمصيبة وش يهونها علي ّ لاصرت داري ...!!

ويــيييييـــن كنت انت الذي لا شفتني.. يشرق جبينك
ما بقى من ذكرياتك غير تنهيــدة نـهـاري !!

لا تعوّدني صدودك يرحـــم الله والدينك
كيف يتحمل دلال المترفة عيش الصحاري

كان جالك عـِــز ّ مني .. ردّه.. الله لايهينك
نفسي ارجع يوم والقى غير ذلـِّي فانتظاري !!!!

قـلــّي وين ألقى دموع ٍ في حياتي ما تدينك؟
إرتكب جرمك ولكن خل موتي باختياري !!

حِسـْـت ابو التاريخ !! ادوّر عن ولادة ياسمينك
مالقيت الا وداع ٍ فيه ميـــــــــلاد انتحاري !!!

ادري انه ما يهمك بس جيتك : شوف عينك
جيت بآسلـّم عليك.. ورحت من دون اعتباري





الصدّ منـّك ولـَّع انواري السود
ومن ظـَـلمتي وزعْـت ليــل المجـّرة

امس انتبادل كل الاوقات بالجود
واليوم .. حتى لي سلامك .. أطرّه ؟

شهدي وملحي بالحلا اجتمعوا ْضدود
لكن ترى قهوة تجافيـك مـُرّه

عقبك على حالي شِـفــَق ناحل العود
والشــوق بَـخــَّر دمْع عيني بـ حرّه

للهمّ رتم ٍ بين الاصوات معهود
وفـ الصوت بحـّـه كلـّما الحزن جرّه

والحظ .. جزل ٍ فالعطا مير مقرود
والله مدري لو بخل وش يضرّه ؟!

إن صار حيلك من مِـلاقاي مهدود
فانا غيابك هـــــدّنـــي ألف مرّه

وماهوب منــّك تِـبْدل اللـّين بالكود
الله يبارك في عذول ٍ تبرّه

كانه تِـغلــِّي وانت خليته اْصدود ؟
فالله يجير الحب مـمـا يسرّه

والله يسـخـِّر لك تصانيفي بـ زود
والا غلاي ..الــلـه يكفـّـيــك شرّه

عشقك من اول لين هالحيــن موجود
هذا غرامك في ضلوعي مقرّه

مسكنك قلبي تسقي الدم بـ ورود
تملا عروقي عطر...... لله درّه

تعـــال ودِّي تطــْـفـِـي انواري السود..
حتـــّى أصَـبـِّح بك على هالمجرّه !





ياما وياما قلت لي .." ياما ْوياما قلت لك "
ياما وياما قلت لك:" ياما وياما قلت لي "

واضح عليك انت الغلا لكن عزيزي مااجملك
لما يجي خلف الغلا قلب ٍ بحبي ممتلي

لا بو همومك و الزعل لابو حبيب ٍ يزعِـلك
آآطى على قلبي إذا قلبك همومه تنجلي

حين ٍ تحسّ انك قمر.. حين ٍ تحس انك ملك
لكن شعور ٍ تجهله : هو قيمتك بالنسبهْ لي

لا تشتكي نار الهوى دام انــّها تـنـشـَبّ لك
غيرك يموت من الصقيع ْولا حِصَل له مشعلي

تدري وش احلى ما أشوفه فيك كلك؟..مُجملك
مدري هو احلى ما تشوفه فيّ .. كلي بـ اكملي ؟

مـاستغرب اسراب النحل يوم انها تنشـدّ لك
العين في لون العسل و الخد ورد ٍ مخملي

أشفـَق على ذيك الجبال اللي تحاول توصلك
تتطاول بْـ طين ْوحصى وانت ْفـسمائي معتلي

بدري على شمس الكواكب والمعامل و الفلك
تنجب مثل نور ٍ الى من شعشع اجْـهَر منزلي

يا صِـبْـر شيطانك عليك ْاشلون هُو مستحملك !!
أكبر عذاريبك خصال الطيـْب يا شيمة هلي

هُـونك على طهري أنا ودي فقط أتأمـلـّك !
لك نظرة ٍ لا داهَمَت يخجل جميع اللي عليّ !!

جاوِب ولكن كانها كـَلـْمتـْك (إيـه ٍ) .. باسألك :
تسمح حبيبي كلمِتِك .. بابني بها مستقبلي ؟

أما ولو صارت بـ نفي ٍ كلمتِك ...... لا يشغلك
لا صار ياما قلت لك:" ياما وياما قلت لي" !!



.،؛/أشعار منقولة باختياري توديعية\؛،.




في امان الله وحفظه